Mediashon ta un proseso, atraves di kua partidonan ku tin diferensia di opinion ku otro ta purba pa yega na un akuerdo final ku judansa di un mediadó. En prinsipio, mediashon por wòrdu usá den kualke tipo di konflikto, un konflikto na nivel familiar, konflikto entre kompaníanan, konflikto riba tereno laboral òf konflikto entre entidatnan privá.

Un mediadó ta brinda e partidonan konserní e oportunidat di sinta na mesa, dialogá, deliberá i haña otro pa asina resolvé nan konfliktonan. Mediashon ta tumando lugar ku mas frekuensia na Reino Hulandes Karibense, pa motibu ku e aparato hudisial ta sumamente okupá. Mediashon a drenta na vigor dia 1 ougùstùs di aña 2005, for di introdukshón di e Kódigo Sivil nobo di Antia Hulandés i Aruba. Mediashón ta enserá ku un hues, na e momento ku un kaso ta andando, por solisitá e intervenshón di un mediadó pa asina e partidonan konserní por haña otro i resolvé na diferensianan di opinión. Un gran bentaha di mediashon ta ku e gastonan korrespondiente ta mas rasonabel ku den un prosedura penal i e solushonnan generalmente ta mas satisfaktorio. Un prosedura penal tin biaha por resultá nèt kontrali di lokual a wòrdu antisipá i komo tal e daño por bira mas grandi òf e konflikto por asta eskalá mas, loke no ta guía na solushonnan duradero den e konflikto.

Partidonan konserní generalmente ke yega na un solushon, sinembargo den hopi kaso esaki no ta posibel sin e asistensia profeshonal di un mediadó. Nos mediadónan por asistíbo pa yega na un solushon satisfaktorio pa tur partido embolbí. Nos mediadónan por resolvé e konflikto ku un solushon rápido i efikas, dor di skucha e motibonan di konflikto di ambos partido i aportá ku konsehonan konstruktivo na e diskushon. Puntonan di salida di Triple A Attorneys pa solushon di bo kaso ta basá ariba ekspertisio, imparsialidat, koutela i integridat.

Pa ken mediashon ta útil?

Mediashón ta útil tantu pa entidatnan/personanan privá komo kompaníanan. Mediashon ta spesifikamente útil den kasonan kaminda partidonan mester di otro pa yega na solushonnan duradero òf partidonan mester sigui atendé ku otro na un forma konstruktivo den futuro. Esaki t’e kaso den mas tatu kaso ku un hende por magina.

Bentaha di Mediashón.

Mediashón ta relativamente mas ekonómiko ku un prosedura huridiko. Mediashón ta ofresé un solushón sin e preshón ku un prosedura penal por krea meimei di partidonan i komo tal e relashon entre partidonan por wòrdu asta mehorá. Mediashon por wòrdu apliká den tur tipo di kaso. Por tuma kontakto libremente ku un di nos mediadónan, sea kual sea e fase di e disputa. Es desir, por ta masha bon a hasi un esfuerso kaba pa dialogá òf e problema a eskalá. No ta importá. E mediadó lo deliberá e posibilidatnan ku tur esnan envolví (mas ku klaro según bo indikashon i deseo) pa pone e fundeshi pa buska un solushón satisfaktorio pa e kaso.